Ertak

Sehrli Kutubxona va Bilimdon Bola

Bor ekan-u yo‘q ekan, qadim zamonda emas, aynan bugungi kunlarda bir go‘zal qishloqda Jasur ismli ziyrak va kitobsevar bola yashar ekan. U har kuni maktabdan qaytgach, qishloq markazidagi kutubxonaga borib, yangi kitoblarni varaqlashni juda yaxshi ko‘rar ekan.

Bir kuni Jasur kutubxonaning eng chekkasidagi javondan eski ammo oltin naqshlar bilan bezatilgan juda sirli kitobni topibdi. Kitobning muqovasida: “Faqat kitobxni yaxshi ko’rgan bolalar uchun ochilaman” deb yozilgan ekan.

Jasur kitobni ehtiyotkorlik bilan ochishi bilan xonani mayin nur qoplabdi. Shu payt kitob ichidan oppoq soqolli, mehribon bir boboning sehrli siymosi paydo bo‘libdi.

— Assalomu alaykum, Jasur, — debdi u jilmayib. — Men Bilimlar podshosiman. Sen kitoblarni sevganing uchun seni bilimlar olamiga sayohatga olib boraman debdi.

Shu zahoti Jasur o‘zini rang-barang, nurli bir olamda ko‘ribdi. Bu yerda daraxtlarning barglari harf shaklida, gullar esa she’rlar aytar ekan. Osmonda esa ertak qahramonlari uchib yurishar ekan.

Jasur birinchi bo‘lib Matematika bog‘iga boribdi. U yerda mevalar sonlar shaklida osilib turar, ularni to‘g‘ri sanagan bola shirin mevalardan tatib ko‘rar ekan. Jasur hammasini to‘g‘ri sanab, bog‘dagi eng dono bola bo‘libdi.

Keyin u Tarix saroyiga kiribdi. Saroy devorlarida buyuk ajdodlarimizning jasoratlari aks etgan suratlar jonlanib, o‘z hikoyalarini so‘zlab bera boshlabdi. Jasur ulardan vatanparvarlik, mardlik va adolat haqida ko‘p saboq olibdi.

Oxirida u Ezgulik ko‘li yoniga kelibdi. Ko‘l suvi shunchalik tiniq ekanki, unga qaragan odam o‘z qalbini ko‘rar ekan. Jasur suvga boqib, mehribonlik, ota-onaga hurmat va do‘stlarga sadoqat eng katta boylik ekanini tushunibdi.

Sayohat tugagach, Bilimlar podshohi unga shunday debdi:

— Esda tut, o’g’lim, sehr kitobning o‘zida emas, uni sevib o‘qigan inson qalbidadir.

Jasur ko‘zini ochsa, yana kutubxonada ekan. Ammo endi u har bir kitob ichida yangi olam yashirin ekanini bilibdi. Shundan keyin u nafaqat o‘zi kitob o‘qibdi, balki do‘stlarini ham kutubxonaga boshlab keladigan bo‘libdi.

Shu tariqa qishloqdagi bolalar bilimli, odobli va orzulari katta bo‘lib ulg‘ayishibdi. 

Ertakdan xulosa: Kitob — insonni ezgulikka, bilimga va katta orzularga yetaklaydigan sehrli xazina.